"Бала тұншығып жатыр": Павлодар полицейлері баланы ауруханаға жеткізуге көмектесті
29 желтоқсанда кешке Қамзин көшесінде патрульдік полицейлер Сыздықов Қазбек пен Қамзин Талғатқа ер адам келіп жүгінді. Көлік жүргізушісі Берік Алпысбаев көлікте уланып, түрі көгере бастаған 2 жасар бала бар екенін түсіндірді. Ол өздерін ауруханаға ілестіріп, тез жеткізуді өтінді. Полицейлер дабыл құрылғыларын қосып, көлікті баласымен бірге облыстық балалар ауруханасына алып барды. Дәрігердің қарауынан кейін баланы жан сақтау бөліміне алып кетті.
"Біз үшін басты міндет баланың өмірін сақтап қалу болды. Әр секунд маңызды болды, өйткені бұл уақытта қала көшелерінде адамдар көп еді", – дейді Павлодар қаласы ПБ ППБ қызметінің аға инспекторы Қазбек Сыздықов.
Алпысбаев өз кезегінде тәртіп сақшыларына алғысын жеткізді.