Атап айтқанда, Ережеге Министрліктің жаңа функциялары қосылды:
- шетелде адам саудасының құрбаны болған ҚР азаматтарының құқықтары мен мүдделерін қорғауды қамтамасыз ету;
- қазақстандықтарды, оның ішінде кәмелетке толмағандарды, ҚР танылған босқындарды және республикада тұрақты тұратын, шетелде адам саудасының құрбаны болған азаматтығы жоқ адамдарды тиісті құжаттармен қамтамасыз ету және ҚР-ға қайтару жөнінде шаралар қабылдау;
- адам саудасының алдын алу бойынша шаралар қабылдау;
- Қазақстан Республикасының заңнамасында белгіленген тәртіппен адам саудасына қарсы іс-қимыл саласындағы тәуекелдерді бағалауға және оларды барынша азайту жөнінде ұсыныстар енгізуге қатысу;
- Республика заңнамасында белгіленген тәртіппен оларға көмек көрсету және арнаулы әлеуметтік қызметтер көрсету үшін адам саудасының құрбандарын қайта жіберуге қатысу;
- ішкі істер органдарын өздеріне белгілі болған дайындалып жатқан не адам саудасына байланысты жасалған қылмыстар фактілері туралы хабардар ету;
- адам саудасына қарсы іс-қимыл саласындағы қызметтің нәтижелері туралы жұртшылықты хабардар ету;
- ҚР азаматтарының өтініштерін өз құзыреті шегінде ҚР Әкімшілік рәсімдік-процестік кодексіне сәйкес қарау;
- цифрлық трансформацияны жүргізу.
Сонымен қатар, жаңа редакцияда келесі тармақ көрсетілген:
- терроризмге және адам саудасына қарсы іс-қимыл жөніндегі халықаралық ынтымақтастық саласындағы ҚР сыртқы саяси бағытын іске асыруды қамтамасыз ету.
Қаулы қол қойылған күнінен бастап қолданысқа енгізіледі.
