Мәжіліс сайтында депутат Мақсат Толықбайдың депутаттық сауалына Ішкі істер министрі Ержан Сәденовтың берген жауабы жарияланды. Сауал ақпараттық қауіпсіздік, медиа саясат және құқық қорғау органдарына деген сенімге қатысты болды.
Соның ішінде полицей киімін киетін азаматтарға қатысты мәселеге байланысты да министр жауап бере кетті.
"Жалған куәліктерді, кісендерді және басқа да арнаулы құралдарды қолдана отырып, құқық қорғау органдарының нысанына жасырынған адамдардың қатысуымен сахналау ("пранктер") жағдайлары бұзақылық, жауапты мемлекеттік лауазымды атқаратын билік өкілі немесе лауазымды адам атағын өз бетінше беру не өзге де әкімшілік немесе қылмыстық жазаланатын әрекеттер ретінде саралануы мүмкін", делінген министр жауабында.
Оның айтуынша, әрбір осындай оқиға бойынша тексерулер жүргізіліп, заңнамада белгіленген шаралар қабылданады.
Бұған дейін Астанада жұртты шошытып, пранк жасаған блогерлер ұсталғанын хабарлағанбыз.