ҚР Ішкі істер министрлігі 2025 жылы 1 шілдеде Ақтөбе облысындағы "Жайсан", Солтүстік Қазақстан облысындағы "Жаңа жол" және Атырау облысындағы "Бөкей хан" шекаралық бекеттерінде ондаған жүк көліктері мен рейстік автобустар Ресей Федерациясына кіру кезегін күтіп, ұзын-сонар кезекте тұрғанын хабарлады. Полиция бұл орындарда қоғамдық тәртіпті қамтамасыз етіп, көлік ағынын реттеп, жүргізушілерге көмек көрсетуде.
"Аталған аумақтарда патрульдік экипаждар мен учаскелік инспекторлар жұмыс істеп жатыр. Олар жүргізушілерге кеңес беріп, жағдайды бақылауда ұстап, жол қозғалысы қауіпсіздігін қамтамасыз етуде. Басқа өңірлерде жағдай тұрақты, өткізу бекеттері қалыпты режимде жұмыс істеп тұр", делінген хабарламада.
Айта кетсек, 30 маусымнан бастап Ресей Федерациясымен шекаралас кейбір бақылау-өткізу бекеттерінде жүк көліктерінің жиналып қалуы байқалуда. Кептелістің бірден бір себебі – көрші елге кірудің жаңа талаптары.
Ішкі істер министрлігі жүргізушілерді сабыр сақтап, тәртіпті бұзбай, полиция қызметкерлерінің нұсқауларын орындауға шақырады.
Бұған дейін, 2025 жылы 4 маусымда Құрбан айтта үйіне асыққан шетелдіктер Түркістан облысындағы шекарада кептеліс туғызғаны хабарланған.