НАТО Бас хатшысы Йенс Столтенберг Ресейдің сыртқы саяси аренадағы ұзаққа созылған агрессиялық әрекеттері альянсты алаңдатып отырғанын айтты, деп хабарлайды Baq.kz Корреспондент порталына сілтеме жасап.
«Әрине, көріп отырған жағдай бізді алаңдатады: Қырымды заңсыз қосып алған, шығыс Украинаны тұрақсыздандырған, Асад режиміне қолдау көрсететін әлдеқайда адуынды Ресей ішкі демократиялық процестерге араласып, кибершабуылдар ұйымдастырып отыр, сондай-ақ, ережелерге негізделген халықаралық тәртіпке қарама-қайшы басқа да әрекеттер жасап отыр», - деді Столтенберг.
Оның айтуынша, Ресейдің дәл осы кері әрекеті НАТО мүшелері мен серіктестерінің Ұлыбританиядағы жағдайға қатысты нәтижелі әрекет жасауына ықпал етті.
«Солсберидегі шабуыл жай ғана жекелеген оқиға емес, ол Ресейдің көпжылдық әрекеттерінің аясында орын алып отыр. Дәл осы оқиға біздің жауабымызға себепші болды», - деп атап өтті бас хатшы.
Еске сала кетейік, Солсберидегі оқыс оқиғаға байланысты Британияға қолдау ретінде НАТО Ресейдегі тұрақты өкілдіктен 7 қызметкердің аккредиттеуін қайтарып алған болатын.
Бұған дейін хабарлағанымыздай, 4 наурыз күні Сергей Скрипаль мен оның қызы британдық Солсберидегі сауда орталығының жанынан ес-түссіз күйде табылған. Юлия Скрипаль жақында ғана есін жиды, ал оның әкесі әлі де комада жатыр. Ұлыбритания әлі күнге дейін Ресейді Скрипальдерді улады деп айыптап отыр