Үржар ауданында суға батып кеткен 56 жастағы ер адамды іздеу шаралары аяқталды, деп хабарлайды Baq.kz ақпарат агенттігі ШҚО ТДЖ баспасөз қызметіне сілтеме жасап.
Құтқарушылардың мәліметінше, ат үстіндегі шопан Қаракөл өзенінің екінші жағасына өтпек болған. Қатты ағын салдарынан жылқы тайып кетіп, тепе-теңдік сақтай алмай қалған ер адам суға құлаған.
Туған-туысқандары оның жоғалып кеткені туралы дабыл қақты. Олар аудандық төтенше жағдай бөлімі және полиция қызметкерлерімен бірге шопанды іздеді, бірақ нәтиже болмады.
«Сол себепті іздеу шараларына Өскемен қаласындағы Шығыс аймақтық аэроұтқыр жедел құтқару отрядынан сүңгуір мамандары келіп көмектесті. Олар шопанның құлаған жерінен 1,5 шақырымдық жердегі су астынан мәйітті алып шықты», - делінген хабарламада.
