Батыс Қазақстан облысында үш және бес жастағы балалар ата-аналарының қарауынсыз қалып, қоқыс төгетін орға түсіп кетіп қайтыс болды, деп хабарлайды Today.kz.
Оқиға 25 сәуірде Қаратөбе ауданы, Сұлукөл ауылдық округі, Ұшан ауылында болған.
"Бала мен қыз көшеде өздері серуендеп жүрген. Балалар көзден жоғалғанда оларды іздей бастаған. Ауылдықтар екеуінің денесін көрші ауладағы қоқыс төгетін ордан 20:00 шамасында тапқан. Қазір прокуратура мен аудандық ішкі істер бөлімі сараптама жүргізіп жатыр. Аталған дерек бойынша қылмыстық іс қозғалды. Балалардың ата-анасын жауапкершілікке тарту мәселесін құзырлы органдар шешеді", – деді Қаратөбе ауданының әкімі Асхат Шахаров.
Балалар механикалық асфикция нәтижесінде қайтыс болған, яғни лас жерде тұншығып қалған. Екі бала ағайынды емес.
