Алматы полициясы люктердің шойын қақпақтарының ұрлануы туралы хабарлаған адамға сыйақы бермек. Бұл туралы ҚазАқпарат қалалық ІІД баспасөз қызметіне сілтеме жасап хабарлады.
Жыл басынан бері 35 люк қақпағы ұрланған. Оның 18-і ізі суымай ашылды.
"Кәріз жүйесінің шойын қақпақтары коммуналдық меншікке жатады. Оны ұрлаған адам ҚР ҚК 188-бабы бойынша жазаланады. Сонымен қатар, көліктер шұңқырға түсіп кеткен жағдайда жол апаты болуы әбден мүмкін. Ұрланған затты сатумен айналысатындарға да қылмыстық жауапкершілік қарастырылған. Заң бойынша олар ұрланған люк қақпақтарын қабылдамауы керек», - деді ІІД ресми өкілі Салтанат Әзірбек.
Полиция кәріз қақпақтарының ұрланғанын көрген азаматтарды 254-40-07; 8-707-500-59-06 немесе 102 нөмірлеріне хабарласуды сұрайды. Бейтарап қалмаған әр адамға сыйақы беріледі.