Жауын салдарынан Петропавл тұрғындары да зардап шегіп жатыр. Шаһарда көпқабатты тұрғын үйлердің жертөлелерін су басқан, деп хабарлайды Хабар 24.
Толассыз жауған жауын-шашын петропавлдықтарды да әбігерге салды. Екі күн бойы жауған нөсердің салдарынан бірнеше көшеде ағын су ағып, аулаларды су басып қалған. Мұнымен қоса, су жеке секторда орналасқан бес үйге кірді. Сондай-ақ бірнеше көпқабатты тұрғын үйдің жертөлелері су астында қалды. Табиғаттың тосын мінезі коммуналдық қызметті де аяғынан тік тұрғызды. Қазір шаһарда 6 техника және 20-дан астам адам су сору жұмыстарымен айналысып жатыр. Жалпы арнайы қызметке тұрғындар тарапынан 40-қа жуық қоңырау түскен.
Ал «Қазгидромет» мамандарының айтуынша, соңғы бірнеше тәулікте бір айлық мөлшердегі жауын-шашын бірақ жауған.
