Түркістан облысының Созақ ауданында бір топ жігіттің арасындағы кикілжің соңы кісі өлімімен аяқталды. Бұл туралы otyrar.kz Түркістан облысы ПД баспасөз қызметіне сілтеме жасап хабарлайды.
Өткен жылдың желтоқсан айының 22-не Құлатай Асылбек Талғатұлын достары келіп үйінен ертіп алып кеткен. Туғандары аман-есен жолдастарымен кеткен ұлының қайтыс болғаны туралы хабарды түнгі үштен аса естіген.
Жиырма бір жасында өмірден озған жігіттің туыстары ерегіске екінші тараптан төрт жігіттің әуелден суық қару алып келгендігіне сенімді.
"Тек тергеу жұмыстарының әділ өтуін тілейміз", - дейді марқұмның жақындары.
Ал Түркістан облыстық полиция департаментінің баспасөз қызметі бұл іс бойынша тергеу жұмыстарының басталып кеткендігі туралы хабарлады.
"2018 жылдың 22 — желтоқсанында Созақ ауданында болған оқиға Созақ АПБ де ҚР ҚК- нің 106 бабы, "Денсаулыққа қасақана зиян келтіру" бойынша СДТТБ тізіліміне тіркелді. Қазіргі таңда күдікті 4 азамат ұсталып, қамауға алынды. Аталмыш қылмыс бойынша сотқа дейінгі тергеу амалдары жүргізіліп, сараптамалар тағайындалды. Тағайындалған сараптама қорытындысы бойынша процессуалдық шешім қабылданады", - деп мәлімдеді Түркістан облыстық полиция департаментінің баспасөз қызметі.
