Павлодар облысы бойынша Мемлекеттік кірістер департаменті бастығының уақытша міндетін атқарушы Қуат Белгібаев екі айға қамауға алынды, деп хабарлайды Zakon.kz pavlodarnews.kz баспасына сілтеме жасап.
Сонымен қатар оның қол астында қызмет ететін Мұрат Жанғазинге да қатысты үй қамаққа алу шарасы қолданылған. Олар пара алды деген күдікке ілігіп отыр. Бұл туралы облыстық соттың баспасөз қызметі хабарлады.
- 24-ақпан күні прокуратураның қолдауымен, қылмысты қудалау органдарының өтініші бойынша Павлодардың мамандандырылған тергеу соты Павлодар облысы бойынша Мемлекеттік кірістер департаменті бастығының уақытша міндетін атқарушы Қуат Белгібаевқа қатысты екі айға қамауға алу шарасын бекітті. Екінші күдікті, департаменттің бөлім бастығы Жанғазинге қатысты екі ай үй қамаққа алу шарасы қолданылды", - деп хабарлап отыр облыстық соттың баспасөз хатшысы Маржан Құрманғалиева.
Күдіктілерге ҚР ҚК 366-бабы 3-бөлігінің 1 және 2-тармақтарына сәйкес (Бір топ адамның алдын ала келісімі бойынша бопсалау арқылы пара алу) айып тағылған.