Алматы облысының полиция қызметкерлері төрт күн ішінде заңсыз есірткі айналымының ірі екі партиясын әшкереледі, деп хабарлайды Zakon.kz.
Облыстық ПД баспасөз қызметінің хабарлауынша, тәртіп сақшылары "Құқықтық тәртіп" жедел алдын алу іс-шарасын өткізу барысында төрт күн ішінде есірткінің заңсыз айналымының 16 дерегін анықтаған. Оның екі дерегі тәркіленген есірткі көлеміне байланысты ірі партиялы есірткі санатына жатады екен.
Ескелді ауданының полициясы арнайы іс-шара барысында 40 жастағы тұрғынды есірткі затын сақтады деген күдікпен ұстады. Автожол бойында қолға түскен күдіктінің тұратын үйіне санкцияланған тексеру жүргізу кезінде 1 килограмнан астам "кептірілген марихуана" есірткі заты табылды. Тергеу кезінде күдіктінің бұған дейін қылмыстық жауапкешілікке тартылғаны анықталды.
Сондай-ақ, санкциялы тексеру кезінде 45 жастағы Еңбекшіқазақ ауданы тұрғынының қорасынан жасырылған 4 килограмға жуық "марихуанна" есірткі заты табылды.
"Арнайы іс-шара барысында есірткіге қарсы күрес бойынша 16 қылмыс дерегі анықталды. Осы деректер бойынша 16 тұлғаны қылмыстық жауапкершілікке тарту көзделуде. Сондай-ақ, екі фактінің ірі партиялы қылмыс санатына жататынын атап өту қажет. Алматы облысының тәртіп сақшылары 7 килограмға жуық есірткі тәркілеп, олардың халық арасына таралуының жолын кесті. Есірткі заттары өсімдік негіздегі марихуана, гашиш сынды есірткі заттарына жатады", - деп атап өтті ведомство өкілдері.