Алматы жұртшылығы қоғам қайраткері, Қазақстан Ұлттық Агроөнеркәсіптік палатасының төрағасы Қажымқан Мәсімовты бақилық сапарға шығарып салды, деп хабарлайды ҚазАқпарат.
Қоштасу рәсімі ҚР Ғылым академиясы ғимаратында өтті. Қаралы жиынға Алматы әкімі Бауыржан Байбек, ҚР Қорғаныс министрі Нұрлан Ермекбаев, Қайрат Келімбетов, Ғани Қасымов қатысты.
Қала әкімі Бауыржан Байбек ҚР Тұңғыш президенті Нұрсұлтан Назарбаев пен Президент Қасым-Жомарт Тоқаевтың көңіл айту жеделхатын оқып берді.
"Құрметті Кәрім Қажымқанұлы! Әкеңіздің мезгілсіз дүниеден қайтуына байланысты қайғыларыңызға ортақтасып көңіл айтамын. Ол кісі кәсіпкерлік қызметпен айналысып, Қазақстан экономикасына өлшеусіз үлес қосты. Ол бар білімін елінің бақуатты болуына арнады. Топырағы торқа болсын!", - деп жазылған Президент жеделхатында.
Одан бөлек, жиналған халық алдында белгілі ғалым Мұрат Жұрынов, мемлекет қайраткері Қанат Саудабаев, Парламент Мәжілісі төрағасының орынбасары Владимир Божко сөз сөйледі. Сонымен қатар, Nur Otan партиясы төрағасының орынбасары Мәулен Әшімбаев, ҚР Еңбек және әлеуметтік қорғау министрі Бердібек Сапарбаев, облыс әкімдері мен Түркия үкіметінің өкілдері көңіл айтты.
Қажымқан Мәсімов 80 жасқа қараған шағында көз жұмды.