Қазақстанда ұлты корей 100 мыңнан астам адам тұрады. Бұл туралы бүгін Ақордада елімізге мемлекеттік сапармен келген Корея Республикасының Президенті Мун Чжэ Инмен кеңейтілген құрамдағы келіссөз барысында ҚР Президенті Қасым-Жомарт Тоқаев айтты, деп хабарлайды ҚазАқпарат.
– "Біздің мәдени-гуманитарлық байланыстарымыздың рет-ретімен ілгерлей түсуіне Қазақстанда тұрып жатқан корей ұлтының азаматтары маңызды үлес қосады. Өзіңіз де білетіндей, корейлер Қазақстандағы он ең ірі этностардың қатарына кіреді. 100 мыңнан астам корей тұрып жатыр", – деп атап өтті ҚР Президенті.
Осы ретте Қазақстан Президенті ел аумағында тұрғып жатқан корей этностарын дамытуға бұдан ары да жан-жақты қолдау көрсетілетінін баса айтты.
– "Біз өз тарапымыздан, Үкімет тарапынан бауырлас корейлердің ұлттық өзіндік ерекшеліктерін қолдайтын боламыз", – деді Қ.Тоқаев.
