Жұматай Әлиев қазақ тілін меңгергенін анықтайтын емтиханнан өте алмады. Бұл туралы ОСК лингвистика комиссиясының мүшесі Әділ Ахметов айтты, деп хабарлайды Zakon.kz тілшісі.
– Әр кандидат емтиханда үш сұраққа жауап берді. Бірінші тапсырма – "Мемлекет және дін" тақырыбына шығарма жазуды өзі таңдады. Екінші тапсырмада Мұхтар Әуезовтің "Абай жолынан" үзінді оқыды. Үшінші тапсырма – "Ырыс алды – ынтымақ" тақырыбында баяндама жасау болды. Кандидат бөлінген уақытты толық пайдаланды. Жазбаша жұмысқа 1,5 сағаттан астам уақыт жұмсады. Дауыстап оқуға дайындалу үшін біраз уақыт дайындалды, – деді Ахметов.
Үміткердің жауаптарын саралай келе комиссия оның мемлекеттік тілді толық меңгермегені туралы шешім шығарған екен.
– Жазбаша жұмысынан өте өрескел қателер табылды. Үтір-нүкте, стилистика және басқа да ережелер бойынша 19 қате шықты. Соның бәрін саралай келе комиссия ортақ шешімге келді, – деп түсіндірді спикер.