Бурабай ауданындағы Зеленоборский ауылдық округінің әкіміне қатысты тергеу жүргізілуде. Ол пара алды деген күдікке ілінген. Бұл туралы бүгін Мемлекеттік қызмет істері және сыбайлас жемқорлыққа қарсы іс-қимыл агенттігінің брифингінде Ұлттық бюроның тергеу департаменті басшысының орынбасары Бауыржан Балғабеков мәлімдеді, деп хабарлайды Zakon.kz тілшісі.
– Ақмола облысында Бурабай ауданындағы Зеленоборский ауылдық округінің әкіміне қатысты тергеу жүргізілуде. Ол пара алды деген күдікке ілініп отыр. Әкім бір азаматтың мүдделерін қорғау үшін одан 500 мың теңге пара алған, – деді спикер.
Ұлттық бюро дерегінше, әкім "Щучинск-Бурабай курорттық аймағын дамытудың 2017-2020 жылдарға арналған кешенді жоспарын" жүзеге асыру аясында Зеленый бор ауылынан жеке тұрғын-жай құрылысы үшін жер телімін бөлу мәселесін қарастыру кезінде пара берушінің мүддесін тықпалаған.
– Ол өз кінәсін толық мойындағаны себепті қамауға алынған жоқ. Тергеу жалғасып жатыр, – деді Балғабеков.