Арыс қаласына Жамбыл облысынан гуманитарлық көмектің алғашқы легі жіберілді. Бұл туралы Жамбыл облыстық "Жас Отан" Жастар қанаты төрағасы Уәли Болатбек өз Instagram парақшасында мәлімдеді, деп хабарлайды Zakon.kz.
Қазірге дейін жалпы құны 8 млн теңгеден асатын 40 тонна азық түлік тиеліп, 60 тонна құрылыс материалдары жіберілді. Оның ішінде 10 тонна ұн, 10 тонна қант, 18 мың дана жұмыртқа, 1,5 тонна тауық еті, 350 келі шұжық өнімдері, 1 тонна сүт өнімдері, 200 келі макарон өнімдері, 1 тонна өсімдік майы, 400 келі печенье, 700 келі қияр және 1000 дана бөлке нан дайындалған.
"Сонымен қатар, Арыс қаласына медициналық қызмет көрсету мақсатында арнайы 4 бригада жіберілді. 2,2 млн теңге қаражат көлемінде қажетті дәрі-дәрмек бөлінді",- деп жазды Уәли Болатбек.
Жамбыл облысында көмек көрсету шаралары жалғасын табады. Алдағы уақытта тосыннан келген апаттан зардап шеккен халыққа 180 тоннадан аса гуманитарлық көмек жолданбақ.
Қазір Арыс қаласынан келген 100-ден аса азаматқа жан-жақты көмек көрсетілуде. Олар жайлы орындарға жайғастырылып жатыр.
