Шымкент қаласының Сыбайлас жемқорлыққа қарсы қызметі алаяқтық жасады деген күдікпен қалалық білім басқармасы №49 орта мектебінің бұрынғы директорына қатысты сотқа дейінгі тергеуді бастады, деп хабарлайды Zakon.kz.
Ол қала азаматынан математика мұғалімі ретінде мектепке жұмысқа орналасуына көмектесемін дегенді желеу етіп, алдау жолымен 500 мың теңге сомасында ақша алды деп күдіктеледі, ал ол іс жүзінде сол кезеңде мектеп директоры болып табылмаған және осы мәселені шешуге уәкілеттілігі де болмаған.
Сотқа дейінгі тергеу жалғасуда.
Күдіктіге қатысты түпкілікті шешімді оның кінәсінің деңгейін анықтау арқылы сот қабылдайтын болады.
Ал Ақтөбе облысының сыбайлас жемқорлыққа қарсы қызметі жемқорлық қылмыс жасады деген күдікке ілінген "Ақтөбе облысының жұмыспен қамтуды үйлестіру және әлеуметтік бағдарламалар басқармасы" ММ "№2 әлеуметтік қызмет көрсету орталығы" КММ директоры К.В.Панға қатысты сотқа дейінгі тергеуді аяқтады.
Ол Ақтөбе қаласы "Астана" ауданы прокуратурасы бөлімінің аға прокурорына КММ тексеру барысында анықталған заң бұзушылықтарды көрсетпегені үшін 1,5 млн. теңге сомасында пара берді деген күдікке ілінген болатын.
Ағымдағы жылдың 26 қыркүйегінде Ақтөбе қаласының №2 сотының үкімімен К.В.Пан пара бергені үшін сотталды және мемлекеттік қызметте лауазымдық қызметпен айналысу құқығынан өмір бойына айыра отырып, оған 22,5 млн. теңге көлемінде айыппұл салынды.
