Иранда бензин бағасының қымбаттауына қарсы наразылық акциясы кезінде 208 адам қаза тапты деп мәлімдеді 2 желтоқсанда "Халықаралық амнистия" құқық қорғау ұйымы.
Кейбір дерек бойынша, қаза тапқандардың саны бұдан да көп болуы мүмкін. The Ney York Times басылымы 450 адамның өлгенін жазды, деп хабарлайды Азаттық.
Үкімет бензин бағасының 200 пайызға қымбаттайтынын мәлімдегеннен кейін Иранда 15 қарашада жаппай наразылық шаралары басталған. Алғашқы акцияларды полиция күшпен басып, Иран билігі бір апта интернетті өшірді.
Таяу Шығыстағы "Халықаралық амнистия" зерттеу бөлімінің директоры Иранның қауіпсіздік күштерінің бейбіт азаматтарды өлтіргенін айтып, халықаралық қауымдастықты қарапайым азаматтардың қанын төккен билік өкілдерін жазалауға шақырған.
Құқық қорғаушылардың айтуынша, "Халықаралық амнистия" растығына көз жеткізген видеожазбада полицияның қарусыз бейбіт адамдарға оқ атқаны көрінеді. Ақпарат бойынша, қаза тапқандардың туыстарына журналистермен сөйлеспеуге және жерлеу рәсімін жасамау туралы ескерту айтылған.