Қазақстандықтарға ерікті зейнетақы жинақтарын (ЕЗЖ) мерзімінен бұрын алуға рұқсат етілді, деп хабарлайды zakon.kz.
1 мамырдан бастап ЕЗЖ есебінен зейнетақы жинақтарын алушылардың тізімі кеңейді.
БЖЗҚ мәліметі бойынша, бұл арада негізгі шарттың бірі - қаражаттың зейнетақы қорында кемінде бес жыл болғандығы. Бұл заң 2021 жылғы 1 мамырдан бастап күшіне енді. Осы жаңашылдыққа сәйкес, ЕЗЖ бойынша төлемдерді ерікті зейнетақы жарналары зейнетақы жүйесінде кемінде бес жыл болған барлық адамдар ала алады.
Енді ЕЗЖ есебінен қордан зейнетақы төлемдерін алу құқығы келесі адамдар үшін қолжетімді:
1) елу жасқа толған;
2) мүгедек болып табылатын;
3) Қазақстан Республикасының шегінен тысқары жерлерге тұрақты тұруға кететiн немесе кеткен шетелдіктер мен азаматтығы жоқ адамдардың, Қазақстан Республикасының заңнамасында айқындалған, кету ниетiн немесе дерегiн растайтын құжаттарды ұсынған;
4) бірыңғай жинақтаушы зейнетақы қорындағы және (немесе) ерікті жинақтаушы зейнетақы қорындағы ерікті зейнетақы жарналары мен оларға есептелген инвестициялық кіріс сомалары шегінде кемінде бес жыл зейнетақы жинақтары бар адамдардың ерiктi зейнетақы жарналары есебiнен бірыңғай жинақтаушы зейнетақы қорынан зейнетақы төлемдерiне құқығы туындайды.
Осылайша, ЕЗЖ есебінен қаражат жинауды мысалы, 20 немесе 30 жастан бастай отырып, тиісінше 25 немесе 35 жасқа толған кезде салымшылар өздерінің алғашқы төлемдерін ала бастайды, - дейді қордағылар.