Медициналық ұйымдардың басшылары жалған вакциналау төлқұжатының сатылуына жауапты болады, деп хабарлайды zakon.kz.
Брифингте Алматы қаласы Денсаулық сақтау басқармасы басшысының орынбасары Лаура Мырзағалидан вакциналау төлқұжаттарының сатылымына қалай тоқтау қоюға болатыны сұралды.
Біз барлық мекеме басшыларын сыбайлас жемқорлық тәуекелдеріне жол бермеу үшін бригаданы және олардың вакцинациялау бекеттерін күнделікті қатаң тексеруге және бақылауға міндеттедік. Бүгінгі таңда әрбір медициналық ұйымның бірінші басшысы өзіне жекелей жауапкершілік алады. Егер фактілер анықталған болса, олар бұл мәселені қызметінен босатуға дейінгі жаза түрінде шешеді, - деп жауап берді Мырзағали.
Бұған дейін ҚР Премьер-министрінің орынбасары Ералы Тоғжанов вакциналау төлқұжатын қолдан жасағандарға қатаң шаралар қолданылатынын айтқан болатын.