Желіде қарағандылық жоғары санатты дәрігер әрі кафедра меңгерушісі жазған аудиожазба тарап жатыр, деп хабарлайды zakon.kz.
Аудиожазбада "Спутник-V" вакцинасын клиникалық сынаудың үшінші кезеңі биылғы жылдың мамыр айында ғана басталғаны, яғни әлі аяқталмағаны туралы айтылған. Сондай-ақ, хабарлама авторы вакциналар бедеулікке әкеледі және денсаулыққа қауіпті деп мәлімдейді. Stopfake.kz бұл ақпараттың жалған екенін хабарлады.
Қарағандыда бір ғана медицина университеті бар. Тиісінше, кафедра меңгерушілері жоғары санатты дәрігерлер сонда ғана жұмыс істейді. Алайда, Қарағанды медицина университетінің баспасөз қызметі қызметкерлердің ешқайсысы мұндай ақпарат таратпағанын ресми мәлімдеді.
– Қолданушылардың бірі аудиожазбаны кафедра меңгерушісі жазған деп айтқан. Бірақ ол біздің университеттің қызметкері емес, – деп хабарлады ҚМУ баспасөз қызметі.
Хабарламаның мәтінінде де жалған мәлімдемелер бар.
Біріншіден, "Спутник-V" вакцинасын клиникалық сынаудың үшінші кезеңі, автор айтқандай, 2021 жылдың мамыр айында емес, өткен жылдың 7 қыркүйегінде басталған. Оның қорытындылары 2021 жылғы 2 ақпанда жарияланып, бүгінде баршаға қолжетімді. Олар вакцинаның тиімділігі мен қауіпсіздігін дәлелдейді.
Екіншіден, COVID-19 қарсы вакциналар, атап айтқанда "Спутник-V", бала туу қабілетіне әсер етеді деп айтуға негіз жоқ. Вакцинация бедеулікке әкелуі мүмкін деген қауесетті препаратты әзірлеушілердің өздері де, Қазақстан, Ресей және басқа елдердің жетекші мамандары да жоққа шығарды.
