Мәжілістің Экология мәселелері және табиғат пайдалану комитетінің отырысында депутаттар Қазақстан Республикасының Энергетика министрі қызметіне тағайындау үшін Мағзұм Мырзағалиевтың кандидатурасын келісті, деп хабарлайды zakon.kz.
Келісім "Қазақстан Республикасының Парламенті және оның депутаттарының мәртебесі туралы" Қазақстан Республикасы Конституциялық заңының 22-1-бабына сәйкес Комитет отырысында қаралды.
Кандидатураны Премьер-Министрдің тапсырмасы бойынша Премьер-Министр Кеңсесінің Басшысы Ғалымжан Қойшыбаев таныстырды.
Мәжілісте енгізілген министрлерді келісу рәсіміне сәйкес, Мағзум Мырзағалиев депутаттардың сұрақтарына жауап беріп, жұмысты ұйымдастыру туралы өзінің көзқарасын айтты.
Атап айтқанда, Мәжіліс депутаттары ел басшылығының бейбіт атомға көшу туралы мәселені қарау жөніндегі тапсырмасына, газдандыру және жаңартылатын энергетика мәселелерінің маңыздылығына тоқталып, осы аталған сала бойынша бірқатар сұрақтар қойды.
Нәтижесінде, комитет отырысы бойынша тиісті қорытынды әзірленді. Құжатта Мәжілістің Экология мәселелері және табиғат пайдалану комитеті Мағзум Мырзағалиевтың кандидатурасын қарастырып, оны Энергетика министрі лауазымына тағайындау үшін ұсынуға болады деп санайды.
