Отырысқа аталған партияның саяси кеңесінің мүшелері мен белсенділері қатысты.
Сайлауалды штаб үгіт-насихат науқанына кірісуге дайын. Кандидаттың сайлауалды бағдарламасы әзір, таратылатын материалдардың, сыртқы жарнаманың дизайны да әзірленді, өңірлердегі проблемалар туралы халықтың пікірін тіркеу бойынша ауқымды жұмыс жүргізілді.
Отырыста сөз алған партия басшысы үгіт-насихат жұмысы алдындағы атқарылған істерді қорытындылады. Оның айтуынша, ЖСДП кандидатын қолдау мақсатында еліміздің барлық өңірінде 121 мыңнан астам қол жиналды. Оның ішінде 119 мыңнан астам қол есепке алынды.
Өкінішке қарай, жиналған қолдың бір бөлігін аумақтық сайлау комиссиялары әртүрлі сылтаумен қабылдамай тастады. Соған қарамастан, біз заңнамаға сәйкес талап етілген көлемді оңай игердік, - деді сайлауалды штаб басшысы Асхат Рақымжанов.
ЖСДП кандидаты үгіт-насихат науқанын бастап та кетті. Ол Шахтинск қаласына аттанып кетті, онда 22 қазанда жергілікті сайлаушылармен кездесу жоспарланған.
20 қазанда Нұрлан Әуесбаевты Орталық сайлау комиссиясы Қазақстан Президенттігіне кандидат ретінде ресми түрде тіркеді.