Сырым Шәріпханов министр ретінде алғаш рет үкімет отырысына қатысып отыр. Жаңа министр әріптестеріне ант мәтінін оқып берді.
"Қазақстан халқы мен президентінің алдында мен бар күш-жігерім мен білімімді Отанымның гүлденуі жолында жұмсауға, мемлекеттің Конституциясы мен заңдарын бұлжытпай сақтауға, Қазақстан халқына адал қызмет етуге салтанатты түрде ант етемін", - деді министр Сырым Шәріпханов
Премьер-министр Әлихан Смайылов министрлер кабинетінің жаңа мүшесіне сәттілік тіледі.
Бұрынғы төтенше жағдайлар министрі Юрий Ильин 10 маусымда қызметінен босатылды. Ол бұл қызметті 2020 жылдың 11 қыркүйегінен 2021 жылдың 18 қаңтарына дейін атқарды. Кейін ол 2022 жылдың 11 қаңтарында, 2023 жылдың 4 сәуірінде қайта тағайындалды. Кадрлардың ауысуы Абай облысындағы 14 адамның өмірін қиған ірі орман өрт аясында болды.
