Президент депутаттарды жаңа сессияның ашылуымен құттықтап, көктемдегі сайлаудан кейін Парламенттегі саяси партиялардың қатары көбейіп, депутаттар құрамы айтарлықтай өзгергенін атап өтті.
"Саяси партиялардың фракциялары, бір мандатты округтан сайланған депутаттар да жұмысқа белсене кірісті. Олар көптеген заң жобасына бастамашылық етіп, өзекті мәселелерді батыл көтере бастады. Депутаттарымыз жазда да көп жұмыс атқарды", – деді Президент.
Небәрі екі айда 1200-ден астам елді мекенді аралап, сайлаушылармен кездесті, тұрғындардың тыныс-тіршілігімен танысты.
Мемлекет басшысы табысты қызмет атқарғаны үшін депутаттарға ризашылығын білдірді.
"Жаңа сессияда жұмыс қарқыны бұдан да жоғары болады деп ойлаймын", – деп түйіндеді сөзін ол.
