Дархан Қыдырәлі президент жарлығымен тағайындалды. Ол Сенатқа Солтүстік Қазақстан облысының әкімі қызметіне ауысқан Ғауез Нұрмұхамбетовтің орнына келді.
Дархан Қыдырәлі бүгін ант берді.
"Қазақстан халқына адал қызмет етуге, Қазақстан Республикасының тұтастығы мен тәуелсіздігін нығайтуға, оның Конституциясы мен заңдарына қатаң бағынуға, депутаттың өзіме жүктелген мәртебелі міндеттерін адал атқаруға ант етемін". Дархан Қыдырәлі
Дархан Қыдырәлі 1974 жылы дүниеге келген. Стамбул университетін бітірген. Тарих ғылымдарының докторы, Қазақстан Республикасы Ұлттық ғылым академиясының академигі.
Еңбек жолын 2000 жылы Х.А. Яссауи атындағы Халықаралық қазақ-түрік университетінде аға ғылыми қызметкер болып бастады. Осы университетте тарих кафедрасының жетекші ғылыми қызметкері, аппарат жетекшісі, доцент қызметтерін атқарды.
2005-2006 жылдары Дүниежүзі тарихы, археология және этнология кафедрасында доцент міндетін атқарушы, Л.Н. Гумилев атындағы Еуразиялық университетінің аға ғылыми қызметкері болды, Қазақстан Республикасы Президентінің Мәдениет орталығы директорының кеңесшісі, директордың орынбасары, Білім және ғылым министрінің кеңесшісі, Президент әкімшілігінің ішкі саясат бөлімінің сарапшысы, Президенттің баспасөз қызметі секторының меңгерушісі, Президент баспасөз хатшысының орынбасары болды.
2012-2014 жылдары Түркі мемлекеттері кеңесі Бас хатшысының орынбасары қызметін атқарған. 2014 жылы Халықаралық Түркі академиясының президенті болып тағайындалды.
ІІ дәрежелі Төтенше және Өкілетті Елші дипломатиялық дәрежесі бар.
2016 жылдың шілдесінен 09.02.2022 жылға дейін – "Егемен Қазақстан" республикалық газеті" АҚ басқарма төрағасы.
2022 жылдың қыркүйегінде Ақпарат және қоғамдық даму министрлігін басқарды. 2023 жылғы 4 сәуірде осы қызметке қайта тағайындалды.
