Қайрат Омаров Қазақстанның ҰҚШҰ-ға мүшелігіне қатысты сан түрлі пікір бар екенін айтты.
"Бүгінге дейін бірде-бір мемлекет ұйымға мүшелігін тоқтату туралы ресми түрде өтініш берген жоқ. Сондықтан ҰҚШҰ құрамында ешқандай өзгеріс болмайды. Әрқашан мұндай ұйымнан тыс болғаннан көрі оның ішінде болған жақсы. Қазақстанда мұндай жоспар мүлде жоқ (ҰҚШҰ-дан шығу туралы – ред. ескертпесі). Бұл ұйымды құруға өзіміз ат салыстық. Ол біздің мүддеміз үшін жұмыс істеп жатыр деп есептейміз", – деді Сыртқы істер министрінің орынбасары.
Қайрат Омаров ҰҚШҰ аясындағы барлық шешім бәтуа негізінде қабылданатынын атап өтті.
"Ешбір мемлекетке ешқандай шешімді таңуға болмайды. Бұл ұйым біздің мүдделерімізге сай келеді және ҰҚШҰ-ға мүше елдер арасындағы ынтымақтастық мәселелерін талқылауға мүмкіндік береді деп есептейміз", – деді спикер.
25 қыркүйекте ҚР Сыртқы істер министрлігінде өткен брифингте министрліктің ресми өкілі Айбек Смадияров "Қазақстан мен Армения ҰҚШҰ-дан шығу туралы келісті" деген ақпаратты жоққа шығарды.
