Министрлік басшысы су тасқыны салдарын жою кезінде барлық негізгі міндеттер орындалғанын атап өтті.
"Бұл барлығымызға қиынға түсті, дегенмен практикалық тәжірибе болды. Біз қорытынды жасадық және болашақтағы алдын алу шараларын анықтадық. Біздің мақсатымыз – табиғи апаттар мен катаклизмдерге ең аз шығынмен тиімді қарсы тұру", — деді Олжас Бектенов.
Осыған байланысты ол өңірлердің әкімдіктері мен мүдделі мемлекеттік органдарға инженерлік және көлік инфрақұрылымдарын, әлеуметтік нысандарды қалпына келтіруді толық аяқтауды тапсырды.
"Су ресурстары министрлігі облыс әкімдерімен бірлесіп, белгіленген мерзімде Гидротехникалық құрылыстарды жөндеу мен салуды аяқтасын. Цифрлық даму министрлігі 2025 жылғы ақпан айының соңына дейін министрліктер мен әкімдіктерде мамандарды оқытуды жүргізе отырып, "су тасқынын болжау және модельдеу" ақпараттық жүйесін енгізуді қамтамасыз етсін. Төтенше жағдайлар және экология министрліктері 2025 жылғы 20 қаңтарға дейін осы жүйені қажетті деректерімен толтыруды қамтамасыз етсін", — деді Бектенов.
Оның айтуынша, төтенше жағдайлар министрлігі орталық және жергілікті атқарушы органдардың 2025 жылғы су тасқыны жағдайының алдын алу жөніндегі іс-қимылдарын үйлестіруді қамтамасыз етуі қажет.
"Өңірлердің әкімдері су тасқынына қарсы іс-шаралар жоспарының алдын ала және сапалы орындалуын қамтамасыз етуі қажет. Ең алдымен, ағымдағы жылдың күзінің соңына дейін елді мекендерінде үйінді жасау, құбырлар мен арықтарды тазалау, гидротехникалық құрылыстардың жай-күйін тексеру және су бұру арналарын дайындау қажет. Бақылау және үйлестіру Қанат Бозымбаевқа жүктеледі", – деп тапсырды премьер-министр.
Бұған дейін су тасқынынан зардап шеккен азаматтарға арналған қалған 104 үй қыркүйек айының соңына дейін тапсырылатындығы хабарланды.
