Ақорда баспасөз қызметінің хабарлауынша, Қасым-Жомарт Тоқаев Магдебург қаласындағы жәрмеңкеде орын алған жантүршігерлік оқиға салдарынан бірнеше адамның қаза табуына байланысты Германия Федеративтік Республикасының Федералдық Президенті Франк-Вальтер Штайнмайерге көңіл айтты.
"Достас герман халқының ауыр қайғысына ортақтасып, еліміздің және өз атымнан марқұмдардың туған-туыстарына көңіл айтамын. Сондай-ақ зардап шеккендердің тезірек сауығып кетуіне тілектестік білдіремін", деп жазылған жеделхатта.
Айта кетсек, 21 желтоқсанда түнде Германияда қайғылы жағдай болды. Магдебург қаласында рождестволық жәрмеңке кезінде бір топ адамды автокөлік жапырып өтті. Салдарынан төрт адам қаза тауып, 200-ге жуық адам жарақат алды. Жүргізуші қамауға алынды. ГФР қайғылы бұл оқиғаны терактіге балады.