4 қазанда Қазақстан құрамасының алтыншы алтын медалын алу мүмкіндігі грек-рим стиліндегі палуан Мейіржан Шермаханбеттің еншісіне бұйырды. Алайда 67 келіге дейінгі салмақ дәрежесіндегі финалда біздің отандасымыз тартысқа толы бәсекеде жапондық Катсуаки Эндодан есе жіберді. Мейржан финалдағы жекпе-жек бастала салысымен, жарақат алып қалды.
Одан кейін грек-рим күресінен Азат Садықов (77 кг) Ханчжоуда Азиаданың қола медалін жеңіп алды. Оның үшінші орын үшін қарсыласы Камбоджадан келген Сопхак Кео болуы керек еді. Алайда ол жарақатына байланысты кілемге шықпағандықтан жеңіс Азатқа бұйырды.
Өкінішке қарай, үшінші орын үшін таласта қазақстандық балуандар Айдос Сұлтанғали (60 кг-ға дейін) мен Мақсат Сайлау (87 кг-ға дейін) қарсыластарына жол беріп алды.
Бокстан 66 келідегі Наталья Богданова жартылай финалдық жекпе-жекте әлем чемпионатының 2 мәрте жүлдегері Жанжаем Суваннафенгке жол беріп, Азия ойындарының қола жүлдегері атанды.
Сонымен қатар, бокстан Қазақстан құрамасында екі финалист бар: Қамшыбек Қонқабаев (92 келіден жоғары) және Карина Ибрагимова (57 келі).
Осы уақытта қазақстандық спортшылардың активінде Азиаданың 50 медалі бар: бес алтын, 11 күміс және 34 қола.
