ҚР Цифрлық даму, инновациялар және аэроғарыш өнеркәсібі министрі Бағдат Мусин мен ҚР Ішкі істер министрі Марат Ахметжанов бірлескен кеңесі аясында Нұр-Сұлтан қаласының мамандандырылған ХҚКО мен қалалық ХҚКО-да болып, қызметтерді цифрландыру барысымен танысты, деп хабарлайды Zakon.kz.
Министрлер мамандандырылған ХҚКО-да жүргізуші куәлігін беру, автомобильге мемлекеттік тіркеу нөмірлік белгісін дайындауға тапсырыстарды автоматтандыру процесімен танысты. Биометрия технологияларын қолдану мен жаңа тәсілдің арқасында жүргізуші куәлігін алу процесі барынша ашық болады және сыбайлас жемқорлық тәуекелдерін төмендетеді.
Сурет: Polisia NEWS
№1 ХҚКО-да «Азаматтарға арналған үкіметтің» төрағасы Сүйеніш Әбділдин жеке куәлік беретін автоматтандырылған терминалды көрсетті. Терминал биометриялық жүйемен жабдықталған, суретке түсіру функциясы бар, интерфейсі де түсінікті. Сол арқылы куәлікті алуға өтініш беріп, суретке түсіп, қолтаңбаңыздың үлгісін қалдырып, QR-кодпен мемлекеттік бажды төлеуге болады. Мұндай терминалдар ХҚКО қызметкерлерінің жүктемесін азайтып, құжатты ресімдеу процесін жеделдетеді.
Осы тәсілді пилоттық режимде енгізу мәселесі пысықталуда.
