Үкімет басшысы Қазақстанның ЕАЭО елдерімен тауар айналымы 4,8% өсіп, 12,6 миллиард доллар болғанын жеткізді. Былтыр бұл өсім 28% болған еді.
Кедергісіз орта құру – ЕАЭО келісімінде көрсетілген қарым-қатынасымыздың негізі. Қазіргі жағдайда елдер біржақты енгізуге мәжбүр болып отырған шектеулердің салдарын теңестіру тетіктерін анықтау маңызды. Бірыңғай сыртқы сауда тізбегін құра отырып, біз отандық өндірушіні қорғауға келістік. Алайда өзара саудада шектеулер енгізілген кезде басқа мемлекеттерді ЕАЭО тауарларымен қамтамасыз етудің белгілі бір деңгейін ұстап тұру үшін, сонымен қатар үшінші елдерден тауарларды жеткізуді жеңілдету үшін жағдайлар жасалуы керек.Қазақстан премьер-министрі Әлихан Смайылов
Оның айтуынша, ЕАЭО елдерінің экспортын дамыту үшін жүктердің транзитінің еркіндігі маңызды. Осыған байланысты еуразиялық көлік дәліздерінің инфрақұрылымын және шығыс-батыс және солтүстік-оңтүстік бағыттарындағы маршруттарды дамыту қажет.
Осы тұрғыда 2019 жылы қол қойылған, бірақ әлі күшіне енбеген жүк тасымалдау келісімін еске салғым келеді. Жұмысты аяқтап, қолданысқа енгізетін уақыт жетті деп ойлаймын, – деді Әлихан Смайылов.
Бұған дейін ҚР премьер-министрі ЕАЭО-ны ұлттық валюталардың бағамын қалыптастыру мәселесін талқылау үшін орталық банктердің консультацияларын өткізуге шақырған еді.
