Алматыда Autograph ТҮК құрылысында бұзушылықтар анықталды
Сурет: Алматы әкімдігінің баспасөз қызметі
Атап айтқанда, "Benta" ЖШС тапсырыс берушісі Autograph ТҮК қабаттылық нормасын бұзған. Эскиздік жобаға сәйкес, нысан 3 қабат + техникалық қабаттан тұруы керек. Алайда қазір кешеннің оңтүстік-батыс жағында 4 қабат, солтүстік-шығыс жағында 3 қабат бар. Сонымен қатар, нысанның ең биік жері шамамен 18 метр, ал рұқсат етілген биіктік 12 метрден аспауға тиіс.
Естеріңізге сала кетейік, 2022 жылы Алматы қаласының Мәслихатының шешімімен және әкімдіктің ұсынысы негізінде құрылыс ережесіне бірқатар өзгеріс енгізілген болатын. Соның ішінде әл-Фараби даңғылынан жоғары орналасқан ғимараттар үшін 3 қабаттан аспайтын, жертөле қабатты қосқанда 12 метрден биік болмауы тиіс деген шектеулер бар.
Қазіргі уақытта Autograph ТҮК-нің құрылыс-монтаждау жұмыстары тоқтатылып, бір ай ішінде бұзушылықтарды түзету және нысанды рұқсат беру құжаттамасына сәйкестендіру туралы нұсқама берілді.
Айта кету керек, талаптарды орындамау сот талқылауларына, соның ішінде нысанның жартылай бұзылуына әкелуі мүмкін.
Жалпы, Алматы әкімі Ерболат Досаевтың құрылысқа бақылауды күшейту тапсырмасы аясында былтыр жыл басынан бері 47 заңсыз нысан, соның ішінде "Мечта", KHAN, "Алма Гарден" және басқа тұрғын үй кешендері толық немесе жартылай сүрілді.
Оқи отырыңыз
