Ақтөбе облысында жерасты газ цистернасы жарылып, алапат өрт болды

Өрт, Ақтөбе облысы, Ойыл ауданы, газ құю бекеті, цистерна жарылды, сурет - Zakon.kz жаңалық 11.04.2024 22:24

Сурет: pixabay

11 сәуірде Ақтөбе облысында газ құю бекеті маңындағы жерасты цистернасы жарылды, деп хабарлайды Zakon.kz.

"Диапазон" басылымының мәліметінше, газ құю бекеті Ойыл ауылының шетінде орналасқан.

"11 сәуірде сағат 20:20 шамасында газ құю станциясынан 50 метр қашықтықта орналасқан жерасты газ цистернасы жарылды. Осыдан кейін "Зайнуллина" ЖК-ға тиесілі станция отқа оранды. Өрт жақын маңдағы құрылыс нысанына да ұласып, от тез тарады", делінген хабарламада.

Ақтөбе облысының әкімдігі оқиға орнында Ойыл ауданының ТЖД және полиция бөлімі қызметкерлері жұмыс істеп жатқанын нақтылады. Өртті сөндіру жұмыстары жалғасуда. Құрбандар мен зардап шеккендер жоқ. Оқиға орнына ТЖД-дан қосымша күш аттанды.

Өнеркәсіптік қауіпсіздік департаменті оқиғаның себептерін анықтау үшін тергеу амалдары қолға алынғанын нақтылады.