Оңтүстік Кореяның көлік министрлігі азаматтық авиация департаментінің директоры Чжу Чжон Ванның айтуынша, қазір мамандар "қара жәшіктен" алынған деректерді дыбыстық файлдарға топтастыруда, деп жазады The Hankyoreh.
"Ұшқыштар кабинасында айтылған сөздер жазылған аудио тіркеу құрылғысындағы деректер алынып болды. Бүгін оларды дыбыстық файлдарға топтастыру жұмыстары басталды", - деді ол.
Шенеунік бұл жұмысты мүмкіндігінше тез жүргізуге тырысатындарын айтты.
Ұшу деректерінің борттық жазбасы - екінші "қара жәшікке" сырттай біраз зақым келгені нақтыланады. Бұл ондағы деректерді өңдеуге шамамен бір айға дейін уақыт кетуі мүмкін екенін білдіреді.
2024 жылдың 29 желтоқсанында Jeju Air әуе компаниясының Boeing 737 жолаушылар ұшағы Оңтүстік Кореядағы Муана халықаралық әуежайына қонғанда апатқа ұшырады. Бангкоктан оралған ұшақта барлығы 181 адам болды, оның ішінде алты экипаж мүшесі де бар. Кейінірек екі адамның (жолаушы мен стюардесса) аман қалғаны белгілі болды. Жолаушылардың басым бөлігі - оңтүстік кореялықтар, бортта екі Тайланд азаматы болған. Қазақстан СІМ апатқа ұшыраған бұл ұшақта қазақстандықтардың жоқ екенін хабарлады.