2022 жылы әскери дайындық бойынша құжатқа сай 1500 адам әскерге шақырылады.
Бұйрық жобасы Ашық НҚА веб-сайтында 28 сәуірге дейін жарияланған.
Қазақстанда әскери даярлықтан өткен резервтің құрамын толықтыру және Қазақстанның Қарулы Күштерінің, басқа да әскерлері мен әскери құралымдарының жауынгерлік және жұмылдыру дайындығын арттыру мақсатында тұрақты негізде әскери дайындық жүргізіледі.
Әскери қызметке запастағы және денсаулығы бойынша жарамдылар оқу-жаттығу жиындарынан өту үшін шақырылады. Оның ұзақтығы бір айдан аспауы керек.
Әскери дайындықтан өту кезеңінде, оның ішінде әскери бөлімге бару және кері қайту жолындағы уақыт, жұмыс орны мен атқаратын лауазымы әскери қызметке міндеттілер үшін сақталады. Орташа жалақысы республикалық бюджет қаражаты есебінен төленеді.
Бұл ретте, әскери дайындықтан жалтарғаны, сонымен қатар әскери дайындық кезінде әскери қызмет өткерудің белгіленген тәртібіне қарсы құқық бұзушылықтар жасағаны үшін 5 АЕК (шамамен 15 900 теңге) мөлшерінде әкімшілік айыппұл салу түріндегі әкімшілік жауапкершілік көзделген.