"КТК" телеарнасының хабарлауынша, Самрат Тыныштықбай кейінгі екі-үш күнде есін жоғалтып, аяқ асты өзгеріп кеткен. 20 жастағы сарбаздың туыстары бұл әскери бөлімдегі әлімжеттіктің кесірі болуы мүмкін деп күдіктеніп отыр.
"Күдігіміз бар, ұрған болуы керек. Әйтпесе, екі күнде ол бүйтіп жынды адамға ұқсап қалмайды ғой. Жынды адам сияқты боп қалған. Оны қорқытып, үркітіп, ұрып-соғып, соны білдірмейтін қылған. Жаңа біреу "психотроп зат салып жіберуі де мүмкін" деді. Сап-сау баланы екі күннің ішінде әскери бөлім психауруханаға жатқызған. Не деген оңбаған адамдар!"Салтанат Тыныштықбай, сарбаздың апасы
Ал әскери бөлімдегілер туыстарының күдігін теріске шығарып отыр. Самрат таңғы сап түзеу кезінде түсініксіз әрекет жасаған көрінеді. Өзге сарбаздарға әмір бере бастаған, пәрмендерді тыңдауды қойған соң медициналық ротаға жібердік деп жауап берген.
"Үндемей сапта тұрады да, бірақ бір кезде бірдеңе деп сөйлеп тұрады. Мысалы, "сапқа тұрыңдар" деп айғайлайды. Өзімен өзі. Сосын өлең айтады. Бәріміз бір сапта тұрғаннан кейін белгіленген тәртіп бар. Ол тәртіпке бағынамыз. Ол тәртіпке бағынбай, бір теріс қылықтар жасады". Әділет Кенжебеков, 35748 әскери бөлімі артиллерия дивизионының командирі
20 жастағы сарбазды кешелі бері тексеріп жатқан психикалық емдеу орталығының мамандары есінде кемістігі бар екені анық дейді, бірақ нақты диагноз 10 күннің ішінде қойылады.
