Polisia.kz берген мәліметке сай, Сарыағаш АПБ-ға Қызылорда облысының тұрғыны келіп арызданды. Жәбірленушінің айтуынша, оның танысы өткен жылдың желтоқсан айында туристік компанияда істейтінін айтып, Меккеге қажылыққа алып баруға уәде беріп, 900 мың теңгесін алған.
Осылайша танысының ақшасын алып, не уәдесін орындамай, не ақшасын қайтармай жәбірленушіге түрлі сылтаулар айтып, әбігерге салған.
Полиция қызметкерлері аталған жайтты ҚР ҚК-нің 190-бабы (Алаяқтық) бойынша СДТБТ-ға тіркеді. Осыдан соң тәртіп сақшылары күдіктіні табуға бағытталған жан-жақты тексеру жұмыстарын жүргізді.
Полицейлердің жүргізген жедел шараларының нәтижесінде, алаяқтық жайтына қатысы болуы мүмкін деген күдікпен жергілікті әйел ұсталды.
Тексеру барысында әйелдің ешқандай туристік компанияда жұмыс істемейтіні анықталды.
Қазіргі таңда аталған жайтқа байланысты сотқа дейінгі тергеу амалдары жүргізілуде. Оқиғаның толық мән-жайы тексеру барысында анықталатын болады.