Жезқазған облысы жабылып, Қарағанды облысының құрамына енген жылдың ескі жұртта қалдырғандай күй кешкізгенін ұмытқан жоқпыз. Өзімізді өзіміз жұбатып, «көп ұзамас, Қарағандының жай-күйі жақсарған соң Жезқазған облысы қайта ашылар» деп үміттенгеніміз де рас. Осылай дегенде: «Қайдағы жоқты айтады екенсің. Жезқазғанның қайта облыс болуы екіталай» деп төбемізден қойып қалғандай әсер қалдырған пікірлерді де естігенбіз. Содан бері 25 жыл өтіпті. Ғазиз Ештанаев, Жезқазған қаласының Құрметті азаматы
ҚР-ның Президенті Қ.К.Тоқаевтың «Ұлытау-2019» халықаралық этнофорумында айтқан Ұлытаудың тарихи орны туралы пікірі, бұл аймақты халықаралық туризм орталығы ету керек деген мазмұндағы сөзі мен «Жошы хан» тарихи-мәдени кешенін салуға тапсырма беріп, оның ашылуына Мемлекет басшысының өзінің келуі, халықтың көңілін көтеріп, құптарлық жағдай болды.
Иә, жиырма бес жыл күткен қуанышымызға жеттік. Осы жылдың 16 наурызындағы Жолдауында Ұлытау өңірі, Абай ауылы, Жетісу өңірі жұртының бөркін аспанға атқызған жақсылық хабар жария етілді. Бүгін Президенттің жаңа облыстарды ашу туралы құзырлы Жарлығы шықты. Қуаныш құтты болсын. Бұл шешім – қазақтың киелі өңірлеріне деген тағзым, еліне деген құрмет. Ұлытау атын иеленген облысымыз өркендеп, жағалай жұрт сүйсінетін облысқа айналып, алдағы күндерде оның аумағы да ұлғайып, өркендеп, өрісін ұлғайтатын ұлық күнге жетейік. Ғазиз Ештанаев, Жезқазған қаласының Құрметті азаматы