Биылғы жылдың жеті айында қазақстандықтарға 1,7 триллион теңгеден астам зейнетақы төленді. 2022 жылғы шілдеде зейнетақы төлемдеріне республикалық бюджеттен 243,3 млрд теңге бөлінді, оның 73,9 млрд теңгесі базалық зейнетақыға, 169,4 млрд теңгесі ынтымақты зейнетақыға төленді. Қазақстан Республикасы Еңбек және халықты әлеуметтік қорғау министрлігінің баспасөз қызметі
2022 жылғы 1 тамыздағы жағдай бойынша зейнеткерлер саны 2 миллион 247 мың адамды құрайды.
Зейнетақы төлемдерінің орташа мөлшері (базалық зейнетақы төлемін қоса алғанда) 2022 жылғы 1 тамыздағы жағдай бойынша 109 156 теңгені құрады. Қазақстан Республикасы Еңбек және халықты әлеуметтік қорғау министрлігінің баспасөз қызметі
Еске сала кетейік, 2018 жылғы 1 шілдеден бастап мемлекеттік базалық зейнетақы төлемі әрбір алушыға оның зейнетақы жүйесіне қатысу өтілі ескеріле отырып, жеке тағайындалады.
Бұл ретте зейнетақы жүйесіне қатысу мерзіміне 1998 жылғы 1 қаңтардағы жағдай бойынша ынтымақтастығы жүйесінде жұмыс істеген еңбек өтілі, сондай-ақ міндетті зейнетақы жарналары (МЗЖ) төленген кезеңдер кіреді.
Сонымен, егер зейнетақы жүйесіне қатысу өтілі 10 жыл және одан аз болса, сондай-ақ ол болмаған жағдайда базалық зейнетақының мөлшері ең төменгі күнкөріс деңгейінің 54%-ын құраса, онда 10 жылдан асқан әрбір жыл үшін оның мөлшері 2%-ға артады.
Мысалы, қатысу мерзімі 20 жыл болса, базалық зейнетақы ең төменгі күнкөріс деңгейінің 74 пайызын, 30 жыл - ең төменгі күнкөріс деңгейінің 94 пайызын құрайтын болады. 33 жыл және одан да көп жұмыс өтілі бар болса, ол ең жоғары мөлшерде – ең төменгі күнкөріс деңгейінің 100% мөлшерінде белгіленеді.
Егер бір ай ішінде КҚК Бірыңғай жинақтаушы зейнетақы қорына бірнеше рет аударылса, жинақтаушы жүйеге қатысу мерзімі бір айды құрайды.
Осылайша, міндетті зейнетақы жарналары неғұрлым тұрақты және толық көлемде төленсе, зейнеткерлік жасқа жеткенде базалық зейнетақы төлемінің мөлшері соғұрлым көп болады.
Өз кезегінде, жасына байланысты зейнетақы төлемдерінің мөлшері 1998 жылғы 1 қаңтардағы жағдай бойынша еңбек өтіліне (кемінде алты ай қажет) және зейнеткерлікке шыққанға дейінгі кезеңде алынған орташа айлық табысқа байланысты.
