Ауыл тұрғындарының қуанышына ортақтасып келген облыс әкімі Нариман Төреғалиев ел ішінде тұңғыштар мекені аталатын Бөкей Ордасы ауданының жыл санап көркейіп келе жатқанын атап өтті.
Сурет: БҚО әкімдігінің баспасөз қызметі
"Мемлекет басшысы Қасым-Жомарт Кемелұлы Тоқаев "Шын мәнінде қазақтың мәдениеті сан саланы қамтиды. Халқымыздың ата-бабадан мирас болған мол мұрасы бар. Сан қырлы ұлттық мәдениетімізді айшықтайтын баға жетпес мұраны сақтап, зерделеу қажет. Оны заман талабына сай жаңғыртып, жер жүзіне насихаттау керек" деп атап көрсетті. Бұл әсіресе, ұлттық мұрамыз бен рухани байлығымыздың негізі - музейлерге үлкен міндет жүктейді. Олардың қатарында облысымыздағы алғашқы қорық – Хан Ордасы музей-қорығын кіргізуге болады. Батыс аймақтағы Каспий қақпасы кластеріне, "Қазақстанның жалпыұлттық киелі орындары" жобасының 100 нысаны қатарына, "ҚР ішкі және келу туризмін дамыту" бағдарламасына енген музей-қорықтың ғимараттары мемлекетіміздің ұлттық мәдени мұрасы ретінде тіркелген. Бүгінгі бірнеше рухани орталықтың ашылуы - ұлттық құндылығымызға, тарихы тереңде жатқан Бөкей Ордасына деген мемлекетіміздің ерекше ықыласы", – деді өңір басшысы өз құттықтауында.
Сурет: БҚО әкімдігінің баспасөз қызметі
Визит орталығы заманауи технологиямен жабдықталған. Орталық кіре-берісіндегі ақпараттық тақтада музей кешені, Бөкей орда ауданы, тұңғыштар мекенінде дүниеге келген танымал тұлғалар жайында деректер көрсетілген. Ақпарат тақтасы арқылы музей-кешенін аралау үшін экскурсияны алдын ала жоспарлап алуға болады. Бірнеше бөлмеге бөлінген визит орталығының ақпараттық бөлімі музей келушілері мен туристтерге кешенді толық таныстыра алатын мүмкіндікке ие. Жаңа ғимаратта балаларға арнайы бөлме, келушілерге қызмет көрсетететін фотолаборатория да бар.
Сурет: БҚО әкімдігінің баспасөз қызметі
Салтанатты іс-шара соңында жергілікті өнерпаздар Жәңгір хан өмірінен қойылым көрсетіп, жиылған жұртшылыққа әдемі әсер сыйлады.
