Қазақстан Президенті солтүстікте Ресей мен Украина, Таяу Шығыста Израиль мен Палестина арасындағы қақтығыстың жалғасып жатқанын еске салды. Ауғанстанда тұрақсыздық жалғасуда. Батыста заңсыз көші-қон мәселесі ушығып барады.
"Бүгінде Газа секторындағы бейбіт тұрғындар, әсіресе балалар мен қарттар қақтығыстың құрбанына айналуда, олардың қауіпсіздігін қамтамасыз ету басты міндет. Осыған байланысты Палестина халқына 1 миллион доллар көлемінде гуманитарлық көмек көрсету туралы шешім қабылдадым".Қасым-Жомарт Тоқаев
Президенттің айтуынша, ондаған жылдар бойы шешімін таппай келе жатқан өзекті мәселелерді зорлық-зомбылық пен лаңкестік әрекеттер арқылы шешуге мүлдем жол берілмейді.
"Қазақстан мұндай әдістерді үзілді-кесілді айыптайды. Жағдайдың шиеленісуі ауыр зардаптарға әкелуі мүмкін. Осыған байланысты біз кез келген жанжалды тек бейбіт келіссөздер мен дипломатиялық диалог арқылы шешуге шақырамыз. Біз үшін барлық мемлекеттердің аумақтық тұтастығын сақтау және олардың ішкі істеріне араласпау басты басымдықтар болып табылады. Біріккен Ұлттар Ұйымы Қауіпсіздік Кеңесінің қарарларын мүлтіксіз орындау және халықаралық құқықты сақтау маңызды" деді. Қасым-Жомарт Тоқаев
Бұған дейін Қасым-Жомарт Тоқаев Қауіпсіздік кеңестері бас хатшыларының үшінші отырысын Астанада өткізуді ұсынған болатын.
