Штабтың мәліметінше, серпіліс қорғаныс бекіністерінің су басуына әкелді.
"Оқиға Сарайшық ежелгі қалашығының археологиялық орны маңында болды. Түнгі ауысымда бөгет бойындағы кезекші координаторлар жылдам жұмыс істеді. Оқиға орнына Махамбет ауданының әкімі Қайрат Нұрлыбаев келді. Жедел түрде 11 бірлік арнайы техника мен бірнеше жергілікті тұрғындар жұмылдырылды. Бөгет бойына топырақ толтырылып, қаптар төселді. Жедел іс-шаралардың нәтижесінде Сарайшық ауылына су кіріп кетпеді", - деп хабарлады штабтан.
Айтуларынша, қазір елді мекеннің бойынан қосымша бөгет салынып жатыр.
Сарайшық ауылдық округіндегі қорғаныс бекіністерінің ұзындығы 13,6 шақырымды құрайды. Оның 5,4 шақырымы қайта қалпына келтірілген ескі бөгет. Төтенше жағдай жарияланғаннан кейін 8,2 шақырым қорған салынды. Махамбет ауданы, Сарайшық ауылында 506 тұрғын үй, 2972 тұрғын бар.
Бұған дейін 13 мамырда Атырау облысында су тасқынының алдын алу жұмыстары жалғасып жатқаны хабарланған болатын. Премьер-министрдің орынбасары Қанат Бозымбаев Атырау облысындағы бөгеттерді нығайтуды тапсырды.
