Құлсары қаласындағы еріктілер штабының жетекшісі Жанаргүл Шарғабаеваның айтуынша, бүгінде пунктте азық-түлік қоры жеткілікті.
"Халыққа азық-түлікті белгілі бір кесте бойынша таратамыз. 500-ге жуық отбасын барлық қажетті заттармен қамтамасыз етіп отырмыз. Қазір 20 тонналық фурамен Атыраудан гуманитарлық көмек келді, оларды 4 пункт арқылы таратудамыз. Бүгінгі таңда ұн, мұздатылған құс етінің, жұмыртқа, жарманың, жаялық пен төсек жабындысының қоры жеткілікті." Жанаргүл Шарғабаева
Құлсарыға тез бұзылмайтын азық-түлік, гигиеналық құралдар мен тұрмыстық химиядан тұратын гуманитарлық көмек облыс орталығынан келеді.
Қазіргі уақытта төтенше жағдай басталғаннан бері Жылыой ауданына 1 мың тоннаға жуық гуманитарлық көмек жөнелтілді.
2024 жылдың 18 мамырында Жедел штаб Құлсары қаласында су тасқынынан зардап шеккен тұрғындар үшін 150 үйдің құрылысы басталатынын хабарлады. Бүгінгі таңда әрқайсысының ауданы 80 шаршы метрді құрайтын 74 стандартты үйге арналған алаңқайлар анықталды. Тұрғын үйлер облыстық бюджет және демеушілік қаражат есебінен салынады.