"Мемлекеттік кірістер комитеті 2024 жылдың 7 қазанынан бастап Қазақстанмен іргелес Саратов облысындағы "Озинки" автомобиль өткізу бекетінде – Тасқала өткізу пунктінде жүк тасымалы жолағындағы жол төсеміне күрделі жөндеу жұмыстарын жүргізу жоспарланғанын хабарлайды. Осыған байланысты өткізу пунктінде шектеулер болуы мүмкін. Жөндеу жұмыстарының аяқталуының болжамды мерзімі - 2024 жылдың 31 қазанына дейін", делінген аталған комитеттің Telegram арнасында.
ҚР ҚМ МКК "Тасқала" автомобиль өткізу пункті арқылы мемлекеттік шекараның Қазақстан-Ресей учаскесін кесіп өтуді жоспарлау кезінде осы ақпаратты ескеруді сұрайды.
Бұған дейін Ақтөбе облысындағы "Жайсан" өткізу пунктінің алдында Ресей Федерациясы бағытынан ағылған жүк көліктерінің ұзын-сонар кезегі пайда болғаны туралы БАҚ-тарда ақпарат жарияланды. Көп ұзамай Мемлекеттік кірістер комитеті түсініктеме беріп, өткізу пунктінің штаттық режимде жұмыс істеп жатқанын хабарлады.
