Синоптиктердің мәліметінше, бүгін қолайсыз метеорологиялық жағдай күтілуде.
"2025 жылдың 4 шілдесінде Шымкентте, Алматыда, түнде Атырауда қолайсыз метеорологиялық жағдай күтіледі", – делінген жұма күні "Қазгидромет" РМК сайтында жарияланған хабарламада.
Қолайсыз метеорологиялық жағдайлар – атмосфералық ауаның беткі қабатында зиянды (ластаушы) заттардың жиналуына ықпал ететін қысқа мерзімді метеорологиялық факторлардың (тыныш, әлсіз жел, тұман, инверсия) жиынтығы.
ҚМ жағдайында қала тұрғындарына ашық ауада, әсіресе тас жолдар немесе басқа ластаушы көздер жанында уақытты қысқартуға кеңес беріледі. Ал созылмалы өкпе, жүрек-қан тамырлары аурулары, аллергиялық аурулармен ауыратын адамдар далада жүргенде өздерімен бірге қажетті дәрі-дәрмектерді алып жүруі керек.
Бұған дейін Қазақстанда аптап ыстықтың орнын жаңбыр жауып, найзағай ойнап, бұршақ жауады деп хабарланған болатын.