Өрттің толықтай жойылғаны туралы бүгін, 22 қыркүйекте облыстық Төтенше жағдайлар департаменті хабарлады.
"Алматы облысындағы қатты тұрмыстық қалдықтар полигонындағы өрт толықтай сөндірілді", – делінген хабарламада.
Өртті сөндіруге Алматы облысы мен Алматы, Шымкент қалаларының, Қарағанды, Жамбыл, Түркістан, Абай және Жетісу облыстарының ТЖД күші, әскери бөлімдердің қызметкерлері (№28237, 52859, 68303) және ҚР ТЖМ "Қазселезащита" мекемесінің мамандары тартылды.
Өрт Алматы облысы, Алатау қаласы маңындағы Әли ауылының жанындағы қоқыс полигонында басталған. Тілсіз жауды сөндіруді қиындатқан негізгі факторлар – 10 метрге дейінгі тереңдікте жану процесінің жүруі мен желдің бағытының өзгеруі.
18 қыркүйекте өртке байланысты Алатау қаласында төтенше жағдай режимі енгізілген еді. Ал 20 қыркүйекте өрттің таралуы шектеліп, оқшауланды.