Дональд Трамп АҚШ-тан тыс жерлерде деректерді өңдеу орталықтарын (дата-орталықтар) салатын америкалық технологиялық компанияларға "аса ірі санкциялар" салатынын ескертті. Алайда ол қандай шаралар қолданылуы мүмкін екенін нақтыламады. Сондай-ақ бұл бастаманы әлі өз әкімшілігіндегі шенеуніктермен талқыламағанын мойындады, деп жазады The Guardian.
Президенттің пікірінше, америкалық дата-орталықтар ел аумағында орналасуға тиіс. Әйтпесе, оларды Қытай өз мүддесіне пайдалануы мүмкін.
"Біз деректерді өңдеу орталықтарының басқа елдерде салынуына жол бермейміз. Өйткені Қытай олардың бәрін өзіне алады. Біз бұған жол бермейміз", – деді Трамп.
Сондай-ақ ол америкалықтарды өз қалаларында дата-орталықтардың салынуына кедергі жасамауға, керісінше, компаниялардан жергілікті қауымдастықтарға қаржылай қолдау көрсетуді талап етуге шақырды.
Осы баспасөз мәслихатында Трамп АТЭС саммитінде кездескен Ресей президенті Владимир Путинмен және Қытай төрағасы Си Цзиньпинмен қарым-қатынасы туралы да пікір білдірді. АҚШ президенті екі көшбасшымен де "тамаша қарым-қатынаста" екенін және бұл байланыстар ел қауіпсіздігін нығайтуға ықпал ететінін айтты.
Бұдан бөлек, Трамп Иранның Вашингтонда "лас бомба" жаруды жоспарлап отырғаны туралы ақпаратты тексеруге уәде берді. Ол мұндай мәліметті әзірге қауесет деп атады. Алайда бұл сценарий жүзеге асқан жағдайда АҚШ әскери күш қолдану арқылы жауап беретінін ескертті.