Ұйымдасқан қылмыстық топ бірқатар заңды тұлғалардың жеткізбеген тауары мен көрсетілмеген қызметтеріне жалған есепшоттар жасап беріп отырған, деп хабарлайды zakon.kz Қарағанды облысы экономикалық тергеулер департаментінің баспасөз қызметіне сілтеме жасап.
Қылмыскерлер ҚР Қаржы министрлігі Қаржы мониторингі комитетінің Қарағанды облысы бойынша экономикалық тергеулер департаментінің қызметкерлері жүргізген "STOP ОБНАЛ" жедел-алдын алу шаралары барысында анықталды.
"TerraStyleKAZ" мен"АзимутИнвест" компанияларына қатысты сотқа дейінгі тергеу ісі қолға алынды. Ұйымдасқан тобы бар екі субъект қызметінің жалпы ақша айналымы 5,7 млрд теңгені құрайды. Мемлекетке салық төлеуден жалтару бойынша келтірілген залал 1,7 млрд теңгеге бағаланады.
Мұндай қылмыс жасағандарға мүлкін тәркілей отырып, сегіз жылға дейін бас бостандығынан айыру жазасы қарастырылған.
